सिन्धुलीको खुर्कोटमा बोलेरो दुर्घटना, १२ जना घाइते — उद्धारमा प्रहरी र सशस्त्र बल सक्रिय
बा २० च ९३१ नम्बरको बोलेरो पिकअप खुर्कोट नजिकैको मरिन डाइभर्सनमा दुर्घटनाग्रस्त भएको हो। प्रहरीका अनुसार बोलेरो सडकबाट अनियन्त्रित भई तल खसेको बताइएको छ।
दुर्घटनामा चालकसहित १२ जना सवार घाइते भएका छन्। सबै घाइतेलाई स्थानीयवासी र सुरक्षाकर्मीको सहयोगमा तत्काल उद्धार गरी सुनकोशी सामुदायिक अस्पताल खुर्कोट पुर्याइएको छ, जहाँ उनीहरूको उपचार भइरहेको जिल्ला प्रहरी कार्यालय सिन्धुलीले जनाएको छ।
घाइतेहरूमध्ये केहीको अवस्था सामान्य रहेको बताइएको छ भने केहीलाई थप उपचारका लागि जनकपुर र काठमाडौं पठाउने तयारी भइरहेको छ।
उद्धारका लागि नेपाल प्रहरी, सशस्त्र प्रहरी बल र स्थानीय गोताखोर टोली खटिएको छ।
घटनाको कारणबारे प्रारम्भिक अनुसन्धान भइरहेको प्रहरीको भनाइ छ। प्रारम्भिक अनुमान अनुसार सडक चिप्लो हुनु र तीव्र गति कारण दुर्घटना भएको हुनसक्ने जनाइएको छ।
स्थानीय बासिन्दाहरूले मरिन डाइभर्सन क्षेत्रमा बारम्बार दुर्घटना हुने गरेको बताउँदै त्यहाँ ट्राफिक व्यवस्थापन र सडक सुरक्षामा सुधार गर्न माग गरेका छन्।